12/08/2009

මාධ්‍ය එල්ලා මිය යා යුතුව ඇත


වර්තමානයේ මිනිස් දිනචරියාවේ මූලිකාංගයක් බවට රූපවාහිනිය පත්වී ඇත. රූපවාහිනිය තරම් නොවූවත් තාමත් පුවත්පත, ගුවන්විදුලිය යන මාධ්‍යවලට මිනිස් ජීවන රටාවට යම් වෙනසක් කලහැකියැයි පැවසුවොත් එය අතිශයෝක්තියක් නොවේ.
ප්‍රවේශය ඇල් මැරුණු නමුත් දෙවරක් සිතිය යුතු මාතෘකාවක් පිළිඹඳ කතිකාවතක් ඇතිකිරීමටය. සිද්ධිය ලෙස මුලින්ම ගෙනහැර පානුයේ සිසුවියන් තිදෙනෙකු කනේරු ඇට කා සියදිවි නසාගැනීමය. එතැනින් කාවින්ද්‍යා ටයි පටියකින් ගෙල වැල ලා මියයන අතර එතැන්සිට සිසු සිසුවියන් මෙතෙක් නොවූ විරූ අයුරින් සිය දිවි නසාගෙන ඇත.
මින් පෙර අතරින් පතර මෙවැනි සිද්ධි පිළිබඳ වාර්තා වුවත් එක දිගට පසුකාලීනව මෙය දිගින් දිගට සිදුවීමට යම් හේතුවක් තිබිය යුතුය. අදාල හේතුව ලෙස මට පෙනීයනුයේ වගකීමකින් තොර වාර්තාකරණයයි.මෙය මුල් සිද්ධියේදී එතරම් දරුණු ලෙස කල එලි නොබැස්සත් කාවින්ද්‍යාගේ මරණය වාර්තාකරණයේදී නම් ඛේදජනක අන්දමට සිදුවිය.
කාවින්ද්‍යා මිය ගියේය. මගේ වෑයම ඇයව අපකීර්තියට පත් කිරීමට නොවේ. නමුත් මාධ්‍ය ඇයව ඉතා අසම්භාවී ලෙස පාරිශුද්ධත්වයට පත් කලේ කාවින්ද්‍යාගේ ගුරුන්ට එලව එලවා පහර දෙමිනි අද වන විට එහි තත්වය ගැන මාධ්‍ය හාංකවින්සියක් නොදනී. ඔවුන් දන්නේ සිය ප්‍රවෘත්තිය විකුණාගැනීමට පමණි.
ප්‍රවෘත්ති වාර්තාකරණයෙන් කාවින්ද්‍යාගේ සමවයස් සිසුන් තුල කාවින්ද්‍යා කල ක්‍රියාව නිරවද්‍ය වන අතර කාවින්ද්‍යා මාධ්‍ය විසින් සුද්ද කල ආකාරයට ඔවුන්ද මාධ්‍ය වෙතින් රැකවරණයක් බලාපොරොත්තු වේ. ඒ නිසා ඔවුන් සිය දිවි නසා ගනී. ලංකාවේ දරුවන් නිරමාණය වී ඇත්තේද එම විදිහටය ලංකාවේ අවුරුදු 15 යනු තනිව තීරණ ගත හැකි වයසක් නොවේ කොටින්ම අවුරුදු 15 දරුවෙකු යනු තාම බබෙකි.
ලංකාවේ දැනට මාධ්‍ය සදාචාරයක් නැත.ඇත්තේ මාකටිං සදාචාරයකි. එසේ නැතිනම් මම දන්න මාධ්‍ය සදාචාරය වෙන එකක් වීමට වෙන්නටද පුළුවන. එහිදීලා මාධ්‍ය ඉටුකරනුයේ සිය මාකටිං මෙහෙවාර මිස ඔවුන්ගෙන් සැබැවින්ම ඉටුවිය යුතු සමාජ මෙහෙවර නොවේ.මාධ්‍යයෙන් සමාජය බලාපොරොත්තු රජතුමාට කඩෙ යාම හෝ හුළඟ යන අතට රුවල ඇදීම නොවේ.මාධ්‍ය සැබැවින්ම අවශ්‍ය වනුයේ මනුෂ්‍යාගේ යහපත උදෙසාය.
තවදුරටත් මාධ්‍ය පවතින්නේ මේ ආකාරයට නම් සමාජය විසින් මාධ්‍ය එල්ල දැමීමට පෙර මාධ්‍ය එල්ලී හෝ කනේරු ඇට කා සියදිවි නසාගැනීම යහපති.

10/29/2009

අහසට වෙඩි තැබූ උණ්ඩය ඔලුවට පාත් වීම

වෙලාව 6.15 ට පමණ වන්නට ඇත. ඉර බහින වෙලාව සිරසට අනුව 6.26 ට යෙදී තිබුන නිසා හතර වටෙන් කළුවර වීමට පටන්ගෙන තිබුනි. මැණික් ෆාම්හි රාමනාදන් ගම්මානයේ සිට ආනන්ද කුමාරස්වාමි ගම්මානයට දර විකුණන්නට ගිය රැඳෙවියන් පිරිස නැවත පැමිණෙමින් තිබුණි. රාමනාදන් ගමෙන් වෙන වෙනම කොටස් වශයෙන් පිටවූ පිරිස නැවත පැමිණෙමින් තිබුනේ එකටය. ඔවුන් පිටව ගොස් ඇත්තේද වැටෙන් පැනලාය.පිරිස එකට එනවිට සැක සිතීමට ඉඩ ඇත එය සාධාරණය. ද්‍රවිඩ විමුක්ති කොටි ඉවරකරලා දැම්මම මුන් දිවි ටිකක්වත් වෙන්න හදනවද කියලා සැක සිතෙන්නට පුළුවන.මේ හේතුව නිසා අදාල පිරිස හා හමුදාව අතර වචන හුවමාරුවක් ඇතිවී ඇත. එකෙකු හමුදාවේ වීරෝදාර සෙබලෙකු වෙත අත් බෝම්බය දමා ගැසීමට උත්සාහ කිරීමේදී හමුදාව අහසට වෙඩිතබා ඇත. පිරිස පැන ගොස් සිය කූඩාරම්වල වැදී දොර වසාගෙන බුදියාගෙන වගේ සිට ඇත. පැනයාමේදී පය පැකිලී ඇද වැටී කාන්තාවක් කුඩා ලමයෙක් හා තවත් හයදෙනෙකු තුවාල ලබා ඇත.
උදය නනායක්කාරට අනුව සිදුවී ඇත්තේ මෙයය. එක අතකට මැණික් ෆාම්වල ඉන්නේ කොටිය නැත්නම් කොටින්ට කඩේ ගිය දෙමළ ජනතාවය. අවුරුදු 3 වයසැති දරුවාත්, පසුව වව්නියා රෝහලේ හදිසි අනතුරු අංශයට ඇතුලත් කල 6 හැවිරිදි නිදර්ශිකාත්, කොටින්ට කඩේ ගිය දෙමව්පියන්ට ජාතක වී ඉපැදුනු නිසා රජ බිසවගෙන් ළමාදිනයේදී "කිස්" එකක් ලබාගත නොහැකිවූ පවින් හා දුවන එක හරියට දුවගන්න බැරිනිසා තුවාල ලැබීමට සිදුවිය.
මැණික් ෆාම්හි කලාප අංක 1,2, හා 3 තුල සිටිනුයේ යුද්ධයෙන් මුලින්ම පලා ආ වැසියන් හෙවත් "කොටි" භාවය අඩුම වැසියන්ය.රාමනාදන් හා ආනන්ද කුමාරස්වාමි ගම්මානද අයත් වන්නේ පෙරකී කලාපවලටය. මෙය සාපේක්ෂව අනෙක් කලාපවලට වඩා නිදහස් හා පහසුකම් වැඩි තත්වයක් පවතින කලාපයකි. එම නිසා රැඳවියන්ට කඳවුරු අතර සංසරණය වීමේ නිදහසක්ද පවතින බැවින් "දිවි" සෑදීමේ වැඩි සම්භාවිතාවක් පවතින්නේද උක්ත කඳවුරු තුලය.
ගංවතුර ගැලුවද, කූඩාරම්වලට වතුර දැම්මද, සිය නිදාගන්න පැදුර එම වතුරේ ගහගෙන ගියද, එම රැඳවියන් ඉවසාදරාගත යුතුය. හේතුව එක්කෝ ඔවුන් කොටින්ට කඩේ ගිය නිසාය නැත්නම් අඩියෙන් අඩිය බිම්බෝම්බ වල දමා ඇති නිසාය. මෙය බලන ඔබට, ලියන මට සහ අප මහා රාජෝත්තමයාණන් වහන්සේ ඇතුළු පරිවාර ඇමති මණ්ඩලය හා සකල විධ ජනතාවට දිනපතා හැදෙන වැසිකිලි යාමේ අවශ්‍යතාවයද සපුරාගත නොහැකිව වැසිකිලි වලවල් උතුරා ගියද ඔවුන් ඉවසා දරාගත යුතුය. ඒ පෙරකී කාරණා නිසාය.
මානව හිමිකම් කාරයින්ට පිස්සු හැදිලාය. උන් දන්න බම්බුවක් නැත. කොටි ටික හොයලා ඉවරයක් කරනකම් මැණික්ෆාම් වැසෙන්නේ නැත. සියල්ල සිදුවන්නේ ඕක ඇතුලේ ඉන්න එවුන්ගේ වැරැද්ද නිසාය. කොටි ටික අල්ලලා බාර දුන්නේ නම්, වැසිකිලි යනකොට කාපු ඔක්කම දැම්මේ නැතිනම්, නිදාගත්තේ නැත්නම් හා බිම්බෝම්බ වල දැම්මේ නැත්නම් කිසි ගැටළුවක් නැත.
අවශ්‍ය වනුයේ ජනතාව රඳවා තබා ගැනීමට නම් අඩුගණනේ ඔවුන්ට අවශ්‍ය මූලික අවශ්‍යතාවත් සපුරා ගැනීමට පහසුකම් සපයා දිය යුතුය. දැන් ඔවුන්ගෙන් එලි බහින්නේ කොටින් සමූලඝාතනය කල තරහා නොව මිනිසාට සිය ප්‍රාථමික අවශ්‍යතා නොමැතිවූකල පැනනගින ක්‍රෝධයයි. මෙයට විසඳුමක් නොයෙදුවහොත් ඊලඟට මෙය මීට වඩා දරුණු හා කලහකාරී ලෙස එලිබසිනු ඇත.

10/27/2009

කාලකණ්ණිකම


මගේ ජොකා හිල්වෙලාය.
ඉලාස්ටික් පවා එලියට පැනලාය.
ඒත්...................
මගේ ඩෙනිම අළුත්ය.

මගේ බයික් එක දිනපතා හෝදනවාය.
250 CBR එකක්ය.
ඒත්...........
දුවන්නේ භූමිතෙල් වලින්ය.

ඔරලෝඅසුව ROLEX ය.
අළුත්ම මොඩල් එකක්ය.
ඒත්...........
කටු දුවන්නේ නැතිය.

කතාව කඩ්ඩෙන්ය
කන්නේ පොෂ් කෑමය.
ඒත්.................
ඇඟේ දුවන්නේ ලේය...

9/27/2009

අහෝ දෙව්දත් නොදිටි මොක්පුර


ලංකාවේ ජීවත් වෙනවානම් ක්‍රම තුනකි.

  1. සිදුවන සියල්ල ගැන දැනුවත්ව මේක අපේ කරුමෙ මොනවා කරන්නද කියලා කටවහගෙන ඉඳීමය
  2. සිදුවන කිසිවක් නොදන්නවා වගේ ඉඳගෙන "ෂා මරු ඔක්කොම හොඳට යනවා" කියා පාරම් බෑමය.
  3. වෙන දේවල් ඔක්කොම බල බල ඉවසාගත නොහැකිව "හොරෙක් හොරෙක්" කියා බෙරිහන් දීමය.
  • පලවෙනි ක්‍රමය අනුගමනය කරන්නා බෙල්ලේ ලණුවක් හෝ රුපියල් සියයක මී පාසානන් කා නිර්වාණය සැපත් කරගනී.
  • දෙවන ක්‍රමය අනුගමනය කරන්නා දහසක් බැඳි පියලි ඇතුන් බරට හිමිකරගෙන දැහැමෙන් සෙමෙන් ආයු වළඳා පරලෝකප්‍රාප්ත වේ.
  • තෙවන ක්‍රමය අනුගමනය කරන්නා සුදු වෑන් එකක එන මාතලී විසින් දිව්‍ය ලෝකය වෙත රැගෙන යනු ලබයි.
අහෝ දෙව්දත් නොදිටි මොක්පුර........!

9/07/2009

නඩුත් හාමුදුරුවන්ගේ බඩුත් හාමුදුරුවන්ගේ


නඩු විසඳීම යන්න අපේ පැරණි රාජාණ්ඩු ක්‍රමය දක්වා ඈතට විහිදී යන්නකි. එහිදී රටේ තිබූ සෑම නඩුවක්ම රජතුමා විසින් විසඳිය යුතුවූ අතර රජතුමා හට නඩු විසඳීම හැර වෙනත් කාර්යක් නොතිබූ බැවින් රටේ සංවර්ධනය ඇමතිවරුන්ට බාර දීමට සිදුවිය.

1815 දී ලංකාවේ රාජ්‍ය පාලනය බිඳවැටෙන අතර ඉංග්‍රීසීන් ව්‍යවස්ථාදායකයක් අධිකරණයක් හා කළුසුද්දන් ටිකක් ඉතිරි කර නිදහස කියා එකක් අපට පටවා රට හැර ගියහ. කළු සුද්දන් ගැන වෙනම කතා කල යුතුව ඇති බැවින් එය මෙතැනට අදාල නැතැයි සලකා අත්හැර දැමූ විට ව්‍යවස්ථාදායකය හා අධිකරණය අතුරින් ව්‍යවස්ථාදායකය ගැන කතා කිරීම මගේ බෙල්ලටද තොන්ඩුව වැටීමට තරම් වැරැද්දක් වන නිසා එයද අතහැර දමා අධිකරණය ගැන කතාකිරීම වටින්නේ අධිකරණය ඇදහිය යුතු තරම් විභූතියක් මේ දිනවල පෙන්නුම් කරන නිසාවෙනි.

රාජ අධිකරණයක වැරදිකරු තීරණය වන්නේ රජතුමාට අවශ්‍ය අන්දමටය. චූදිතයා රජතුමාගේ තරහකරුවෙකුනම් අනිවාර්යයෙන් ඔහු නිවැරදිකරු වුවත් බෙල්ල ගහලා යෑම සාමාන්‍ය සිරිතයි. කැකිල්ලේ රජතුමා හැරුණු කොට මුග්ධ තීන්දු දුන් අවස්ථා එහෙව් රාජ ඉතිහාසයේ වුවද දක්නට ඇත්නම් ඒ ඉතාම අල්පයක් විය යුතුය.

ඉන්පසු ජනතාව ශිෂ්ඨාචාරගත වන අතර රජතුමා සංකල්පය හෑල්ලු වී ගොස් ලංකාව රෝම ලන්දේසි නීතිය වැළඳ ගැනීම සිදුවේ.උසාවිය ලංකාව තුල වැදගත් ආයතනයක් බවට පත්වන්නේ රාජාණ්ඩුවට සාපේක්ෂව එහි පැවති සාධාරණත්වය හේතුවෙනි. එහෙව් වූ ලංකාවේ උසාවිය හෑල්ලු වන්නේද අද ඊයේ නොවේ. ජෝන් කොතලාවලගේ "ගොයම් කොළේ" නඩු තීන්දුවේ පටන් උසාවිය හෑල්ලු වී ඇත. කතාවේ සත්‍ය අසත්‍යතාවය කෙසේ වෙතත් වර්තමානයේ සිදුවන දේවල් අනුව එය බොරුවක් කියාද බැහැර කිරීමද කල නොහැක. එසේ ආරම්භ වන මෙම හෑල්ලු වී යාම ජනතාව තුල අධිකරණය කෙරෙහි පවතින්නාවූ විශ්වාසය නැත්තටම නැතිවී යන තත්වයකට පත්වීම දක්වා පහතට ඇදවැටීම අතිශය කණගාටුදායකය.

"තිස්සනායගම්" පවත්නා ක්‍රමය තුල බුදියගන්නන් හා බුදිය නොගන්නන් බොහෝ දෙනෙකු මේ දිනවල කතිකා කරන තේමාවක් වන අතර දින 14 ගතව මෙය පිළුණු වී යාමට මත්තෙන් ඌණ පූර්ණයක් එක් කිරීමේ අවශ්‍යතාවය මත මෙම සටහන සම්පාදනය වනු ඇත.

"දෙමළ ජනතාවට කිසිදු රැකවරණයක් ආන්ඩුව විසින් ලබා නොදෙන බව ඉතා පැහැදිලිය මෙම ඝාතනයන්ගේ ප්‍රධාන වගකිව යුත්තා වන්නේ රාජ්‍ය ආරක්ෂක හමුදාවන්ය"

"සිවිල් ජනයාට එරෙහිව මෙවැනි ප්‍රහාරයන් කරන්නේ වාකරේ ප්‍රදේශයෙන් ජනතාව පලවා හැරීමේ අරමුණින් යුතුව ඔවුන් හාමතට පත් කරමින් හා ඔවුන්ට වෛද්‍යාධාර ලබා නොදෙමිනි"

සුනන්ද දේශප්‍රිය "රාවයට" කියා තිබූ අන්දමට තිස්සනායගම්ට හිරේ යාමට තිබූ ආසන්නතම හේතුව අදාල "NORTH EASTERN MONTHLY" සඟරාවට සැපයූ ලිපි දෙකක වූ උක්ත ප්‍රකාශයන් දෙකය.

මේ වගේ නින්දිත කතා කියන එවුන් හිරේ දමා මදිය ඕකුන්ව එල්ලා දැමිය යුතුයි කියා ඉහත ප්‍රකාශ දෙක කියවා යමෙකුට සිතේ නම් එය සිතූ මහා උගත් මොලයෙන් මෙයත් කල්පනා කර බලන්න. සාමාන්‍ය ත්‍රස්තයෙකු පමණක් නොව (දේශප්‍රේමීන්ට අනුව ) නැගෙනහිර කොටි නායකයා වූ කරුණා අම්මාන් හෙවත් විනයාගමූර්ති මුරලිදරන් හට ඇමති කමක් දී ජනතාවගේ සල්ලි කෑමට අවස්ථාවක් ලබාදී තිස්සනායගම්ට හිරබත් කෑමට දීම ඔබ කොතරම් සාධාරණීකරණය කරනවාද?. අදාල සඟරාවේ ප්‍රකාශක ජෙසීහරන් හා ඔහුගේ බිරිඳ වූ නිසා අල්ලාගත් වලර්මදී තාමත් ත්‍රස්ත විමර්ශක ඒකකය භාරයේය.ඔවුන්ටත් මේ ඉරණමම අත්වනු නිසැකය.

අවසානයේ මම මේ තේරුමක් නැති අධිකරණයේ තීන්දුවකට විරුද්ධ වෙමි. අධිකරණය කුමක් පෙන්වා දුන්නද ලංකාවේ ඇත්තේ රාජාණ්ඩුවකි. අධිකරණයද රාජාධිකරණයකි. වෙනසකට ඇත්තේ නඩු අහන්නේ රජතුමා නොවීමය.
නමුත් තීන්දුව නම් ස්ථීරය.

9/02/2009

මමත් කොටියෙක්ද දන්නෙ නෑ...

නපන් මගේ ඇස් දෙකට පිහියෙන් ..
මේවා මට පේනවට...
ඇදප
න් මගේදිව එලියටම...
මේවා කියවනවට...
කපපියව් මගේ අත් දෙක...
මේවා ගැන ලියනවට..
අනේ දෙවියනේ...
මමත් කොටියෙක්ද දන්නෙ නෑ...


මාධ්‍යවේදියාට නිදහසේ අදහසක් ප්‍රකාශ කරන්න බැරිනම් මාධ්‍ය නිදහසක් තියෙන්නෙ අහවල් මගුලකටද..
හරියට හරි..

8/18/2009

අහෝ ඛේදයකි....!


පෘතුගීසීන් ලංකාව යටත් කරගෙන ලංදේසීන්ට පිංසිද්ද වෙන්නට උන් ලංකාවෙන් නෙරපා හරින ලදී.
එහෙම පැලපදියම් වෙන්න දඟලපු ලංදේසීන්‍ව ඉංග්‍රීසීන් එලවලා දැමූ පසු ලංකාවේ අන්තිම රජතුමාත් ලංකාවෙන් පිටුවහල් කර දැමීමට තරම් ඉංග්‍රීසීන් කාරුණික විය.
එහෙව් ලංකාවට නැවත රාජකීය නාමය මහින්ද රාජපක්ශ ශ්‍රීමතානණ් හා ඔහුගේ ලෙදර් සෙරප්පු ඔපදමන ගෝල බාලයින් විසින් නැවත රැගෙනවිත් පූජා කරවන ලදී. නව රජතුමා වූයේ මහින්ද රාජෝත්තමයාණන් වහන්සේය. පෙරලුන පිට හොඳයි කියන ජාතියේ අන්ධ දේශප්‍රේමියන් කුමක් කීවද ලංකාව නැවත රාජකීය පාලනයකට යටත් වී ඇත්තාහ. ආදී ලංකාවේ රාජ නාමයට විරුද්ධව වචයක් දෙඩීම හෝ බෙල්ල ගහලා යන වරදක් වූ නිසා රජතුමා කියන හැම මගුලටම එසේය දේවයන් වහන්ස කීමට ඇමතිවරුන් බිහිවී තිබුනි. වාසනාවකි අපිටත් දැන් රජෙකු බිහිවී ඇත. ඇමතිවරුද රජතුමාගේ දැමෙන් සෙමෙන් ගෙනයන රාජ්‍ය පාලනයට මනා සහයක් ලබා දෙන්නහුය. සතුට නිමක් නැත්තේය.
එතනින් රට වැසියන්වෙත හැරෙමු..
පසුගියදා රජතුමාට එරෙහිව කෙලියා යන වචනය යොදාගැනීම වෙනුවෙන් සාපරාධී අපහාස නීතිය යටතේ හිරේ දැමූ රට වැසියන් දෙදෙනා ඔවුනගේ නීතීඥයා විසින් ලංකාවේ රාජ්‍ය පාලනයක් නැති බව ඔප්පු කිරීමෙන් පසු නිදහස් කරන ලදී. ඇත්තටම එතකොට අපිට රජෙක් නැද්ද? එහෙනම් ඇයි ඔවුන්ව රාජපුරුෂයින් අල්ලගෙන ගියේ. ගෝමස්ද මේ රටේම වැසියෙක් බැවින් ගෝමස්ට හැඟීගියේ ලංකාවේ කොටසකට රජෙක් ඇතිවාක් මෙන්ම කොටසකට රජෙක් නැති බවය. රජෙකු ඇතැයි කියනාවුන් දේශප්‍රේමීන් වන්නා සේම රජෙකු නැතැයි කියනාවුන් දේශ ද්‍රොහීන් වන්නාය. එම හේතුව කරණකොටගෙන ලංකාවට රජෙක් නැතැයි කියන්නාවූ පිරිස රාජපුරුෂයින්ගෙන් කසපහර කා ෂොපින් බෑග් ගීලදමා මරුමුවට පත්විය යුතුය. රාජපුරුෂයින් ආක්‍රමණිකයින්ගෙන් රට මුදවා ගත් බැවින් වැසියෝ ඔවුනට සේවය කල යුත්තාහ ඔවුන්ව ඉවසිය යුත්තාහ.

ප්‍රීතී ප්‍රීතී..

එතකොට අපිටත් රජෙකු ඇත්තේ කියලා පාරම් බෑවට රජෙක් නැද්ද.
අහෝ ඛේදයකි....!

8/05/2009

පසුවදන


මුලින් ගුරු ගෙදරින් පටන් ගැනුන ලාංකීය අධ්‍යාපනය පසුව පාසල දක්වා වර්ධනය වූයේ මිනිසුන්ගේ චින්තනය මෙන්ම සාමාජීය වර්ධනයක් ලෙස මම පැහැදිලි කර ගනිමි. ඉන්දරේ විසින් ඉදිරිපත් කරන ලද කාවින්ද්‍යාගේ සටහන එම චින්තනීය විප්ලවයේ පැහැදිලි තිරිසන්භාවය මැනවින් දර්ශනය කොට ඇත.

කෙසේ වෙතත් මගේ වෑයම ඉන්දෙරේට පසු වදනක් සැපයීමය.

ලංකාව තුල වැඩිහිටියන්ට පමණයි චිත්‍රපට තහනම් කර ඇත.ඒ අනුව ලංකාව තුල ජීවත් විය යුත්තේ ලමයින් පමණි මින් මතුවට ලංකාවේ චිත්‍රපට තුලින් සමලිංගිකත්වය, ලිංගික ගැටලු, කොටින්ම ස්ත්‍රී දූෂනයක් වුවද සාකච්ඡා කල නොහැක.
එතැනින් අපි කාවින්ද්‍යා දෙසට හැරෙමු. අවුරුදු 13-15 යනු ගැහැනු ලමුන් බහුතරයක් වැඩිවිය පත්වන්නා වූ වයස් සීමාව ලෙස මගේ සීමිත ජීව විද්‍යා දැනුමට අනුව මම දැන සිටිමි. ලමයින්ට ලිංගික අධ්‍යාපනය ලබාදීමේ අවශ්‍යතාවය පැනනැගෙන්නේ මෙම අවදියේදීය. නමුත් සිදුවනුයේ ලිංගිකත්වය හැකිතාක් සැඟවීම නොවේද ?. ද්වීතීයක ලිංගික ලක්ෂණ හා සබැඳුනු කුතුහලය නිසා කාම නරුමයන්ගේ ගොදුරු බවට පත්වීමද නිතැතින්ම සිදුවන්නේ එහි අතුරු ප්‍රතිඵලයක් වශයෙනි. ලාංකීය අධ්‍යාපන ක්‍රමය තුලින් මෙම අයිතිය ලමයින්ට නොලැබෙන හෙයින් අදාල වයස් සීමාව තුල බහුතරයක් සිසුන්හට ලිංගිකත්වය මැජික් එකක් මෙන් දර්ශය වීම මම සාධාරනීකරණය කරමි.
මා කතා කරනුයේ කාවින්ද්‍යාගේ ජංගම දුරකථනයේ අදාල චිත්‍රපට තිබුනායැයි ස්ථාවර්යේ සිටගෙනය.

එසේ නොවූවානම්.....


කාවින්ද්‍යා රෝහලට ගෙනයන විටත් ඇගේ ටයි පටිය බෙල්ලටම තදවී තිබුණි. එය බුරුල් කිරීමට මහා උගත් එකදු ගුරුවරයෙකුහටවත් නොහැකිවීද. ප්‍රථමාධාර මෙවැනි අමනොඥ ගුරුවරුන් නොදන්නවා විය යුතුය. මෙය මියුසියස් විදුහල තුල සිදුවූ ප්‍රථම දිවිනසාගැනීම නම් කමකුත් නැත. නමුත් මිනිස් ජීවිතයක් නිසා කමක් නැත්තේද නැත. මින් පෙරද ශිෂ්‍යාවක් උඩුමහලකින් පහලට පැන දිවිනසාගත් කතාවකුත් ඇත.

ලංකාව තුල තවදුරටත් මෙසේ ලිංගිකත්වය මැජික් එකක් වූවොත් මීලඟ ප්‍රතිඵලය මීට වඩා දරුණු විය හැක. මේ නිසා සිදුවන ගබ්සා මරණ ගණන් බැලීමටද නොහැක. තවත් මහා සංස්කෘතික හරඹ කරන උගතුන්ගෙන් වැඩක් නැත. අවශ්‍ය තත්වය දැන එයට පිලියම් යෙදීමය.

7/01/2009

සම්මාදම



සුබ සාධක රැස්වීම.

කරපු වැඩකට ඇති සුබ සාධනයක් නෑ. ඒ වුනාට කලට වෙලාවට පඩියෙන් අදාල ටික නම් ගන්න අමතක වෙන්නෙ නෑ. සභාපති ලේඛම් දෙපලගේ කතාවෙන් පස්සෙ යෝජනා 2ක් ආවා.
එකක් පටබැඳිගෙන්
අනික බණ්ඩාරගෙන්.
පටබැඳිගේ යේජනාවට මම ඡන්දය දුන්නේ පටයා මගේ යාලුවා විතරක් හින්දා නම් නෙමෙයි. අනික හමුදා රෝහලක බිත්තියේ තීන්ත ගානවට වඩා බඩු ටිකක් අරන් ඒ මිනිස්සු ගාවට යන එක වටිනවා කියලා මට හිතුනා. සහනාධාර අරන් යන පැත්ත පරාද වුනේ අපිටවත් හිතාගන්න බැරි ඉදිහට. තීන්ත ගාන්න ඡන්ද 43ක් තිබුනා.

අන්තිමට අපි තීරණය කලා හැමෝම ලඟට ගිහින් මේක කතා කරන්න.

"උඹට ඕනිනම් ඔය දෙමලුන්ට කන්න ගෙනියපන් අපිට රටේ තොටේ පාරෙ බැහලා ඇවිදින්න දුන්න මිනිස්සුන්ට අපි මොනවා හරි කරනව "

"කොටින්ට උදව් කරපු එවුන්ට කන්න දෙන්න අපිට ඕන කමක් නෑ."

අමාරුවෙන් හොයාගත්ත රුපියල් පනස්දාහෙන් පටන් අරගෙන අපි අපේ ගමන පටන් ගත්තා.

ඒත් හමුදා රෝහලේ තීන්ත ගාපු උන්ද නැත්නම් සහනාධාර අරන් ගිය අපිද වැරදි. මම හැමදාම වගේ මම හරි යන මතය වෙනුවෙන් පෙනී සිටිමි.

6/18/2009

සරසවි දේශපාලනය.


කැලණිය විශ්වවිද්‍යාල සිසුන් සහ ගම්වැසියන් අතර ගැටුමකින් නැවත දැනුම් දෙන තුරු කැලණි සරසවිය වහලා දමලා. පත්තර බලපු ප්‍රවෘත්ති අහපු අය ඉන්නවනම් මේක මහ ලොකු ආරංචියක් නෙමෙයි. මෙච්චර දෙයක් වුනා. අනික් විශ්වවිද්‍යාලවල සමහරක් මේක දන්නෙවත් නෑ.
ඉතින් ඇයි ඒ දන්නේ නැත්තේ........ !
රැල්ලොන්ට අනුව නම් උන් අලයෝ.ඒත් ඇයි උන්ට එහෙම වුනේ.

මම දකින විදිහට ගැටලුව තියෙන්නේ දේශපාලනයේ. මිනිහා දේශපාලන සත්වයෙක් නම් විශ්වවිද්‍යාල ශිෂ්‍යයා කියන්නේ හත්දෙයියනේ වෙනම සතෙක්ද. ඒත් ගැටලුව තියෙන්නේ දැනට විශ්වවිද්‍යාල තුල පවතින ප්‍රවාහය උචිත දේශපාලනයක් නොවෙන එක.ශිෂ්‍යයින් එක පක්ශයකට කඩේ යනකොට උප කුලපති තව පක්ශයකට කඩේ යනවා.

ඔන්න ලංකාවේ සරසවි තුල තත්වය..........

විශ්වවිද්‍යාලතුල දේශපාලනයක් තිබිය යුතුය කියන එකට විවාදයක් නෑ. දේශපාලන පක්ෂ මේ සරසවි වලට ගෑවීමෙන් මූලිකව ගැටලු දෙකක් ඇතිවීමේ හැකියාවක් තියෙනවා

  1. දේශපාලන පක්ශයේ න්‍යායපත්‍රය අනුව ක්‍රියා කල යුතු වීම.
  2. ප්‍රතිවිරුද්ධ අදහස් දරන සිසුන් අතර මත ගැටුම් ඇතිවීම.
හැම ගැටුමකටම මුල පක්ශ දේශපාලනය.එක පැත්තක් රැල්ලො අනික් එවුන් අලයො නැත්නම් බොගයෝ.වෙනත් ගැටුම් තියෙන්නේ බොහොම අල්පයක්.
ඉතින් පක්ෂ වලට කඩේ යන්නේ නැති මහා ශිෂ්‍ය සංගමයක් විශ්වවිද්‍යාලතුල හැකි ඉක්මනින් ඇතිවිය යුතුය. නැත්නම් ලංකාවේ
පාසලක හා සරසවියක වෙනස නිල ඇඳුම පමණක්ම වනු ඇත..

ඇරඹුම

ඔක්කම ඉවත් කරලා අලුතින් පටන් ගත්තා. මිනිහා කියන්නේ දේශපාලන සත්වයෙක්ලු. මම මිනිහෙක් මම දකින මගේ දේශපාලනය මට ඕනි විදිහට මම කියනවා. අකමැති නම් අකමැත්ත ප්‍රකාශ කරන්න හේතු දක්වන්න. බුද්ධිමත් සංවාදයක් ගොඩ නැගෙනවානම් ඒ ඇති.